“Ons Dorpshuis” dee vrijdagaovond ok met aan de ‘Streektaoltied’ die organiseerd wör deur de vrijwilligers van het ‘Huus van de Taol’ in de gemèeinte Aa en Hunze.
Met de zeuvende pries gunnen ze weer naor hoes. Der deden 26 groepen met. Niet gek toch?
Zesentwintig groepen bestaonde oet veer of vief personen, allemaol ofkomstig oet de gemeente Aa en Hunze, bonden 24 jannewaori in Grand Café Hofsteenge in Raol met mekaor de stried an om de fel begeerde trofee die te winnen was tiedens de eerste ‘Streektaolstried’ .
De ‘Streektaolstried’ is een quiz die geheuil in de Drèentse taol holden wordt. De organisaotsie lig in handen van de vertegenwoordigers oet de gemeente Aa en Hunze van het ‘Huus van de Taol’: de Taolschulte en zien Keurnoten.
In aacht rondes met aal aacht opdrachten muzzen de groepen zuch bugen over de vraogen die onder meer betrekking hadden op de Drèentse taol, cultuur, geschiedenis en muziek.
De prissentaotsie van dizze aovond was in goeie handen van Jan Germs, old-directeur van het ‘Huus van de Taol’ in Beilen, die naost de vraogstelling een schat an mooie infermaotsie deurgaf an de deeilnimmers over de provincie Drenthe in al zien facetten.
An het èende van de aovond gungen, nao een spannende stried, vief inwoners oet Aomen en Ieghaor, onder de noemer ‘de Broekstreek’ der met de pries vandeur.
Behalve de wisseltrofee weurden ze alle vief eigenaor van een staopel mooie Drèentse boouken.
Het volk in de zaol was slim bliede met dizze aovend. Taolschulte, Jan Hartlief, beloofde dat het niet bij dizze ene keer blieven zal.
Aander jaor is der ok een 'Streektaolstried’ in Aa en Hunze.